🧐 Einblick in unser Vereinsleben...

25.10.2025 Unterhaltungsabend im Rössli Dürrenast...

Vorem ne voll bsetzte Saal hei mir "der Mann im Mond",.... uf dr Ärde gspillt vom Ruedi Schertenleib, zum Beschte gäh. Mir hei üs grad schier säuber chli übertroffe wo mer de du na de zähne nach 12 vortreite Lieder, Klub, Quartett, Duett, si ab dr Bühni klatschet worde........ e wunderschöne Abe mit zfridnige Gescht, was wei mer meh.... Nächscht Jahr, faus mrs aus Klub möge stemme und erläbe, 24.10.2026 zur selben Zeit in selbem "Theater" .....

******************************************************

Klubusflug Samschtig 4. Oktober 2025 Bernhard Luginbühlpark Mötschwil

Mir si im Luginbühlpark nid zum stuune us cho. Was dä Maa i sim Läbe alles bewärchstelliget het isch ungloublech. Üsi Hochachtig isch ihm sicher. Mir si dert fürschtlech mit Apéro u Plättli bewirtet worde u si när mit üsem gmögige Schofflör wyter trötschgelet i ds Löchlibad nach Obergoldbach. E so e schöne u gmüethlech Gasthof im Ämmitau wo me nume cha empfähle. Mit em ne feine Mönü si mer verwöhnt worde, u es "Mostchöpfli" het de o nid dörfe fähle. Sogar üse Merrängge-Moudi isch ume uf sini Rächnig cho.... Ds Wätter het Gott Lob mitgmacht. Ersch uf der Heifahrt isch es cho rägne..... Aus i auem e glungene u fröhleche Usflug isch das gsi...

Mittwoch 6. August 2025

Hach.... 😍 können Überraschungen schön sein.......... zum Geburtstag "es Ständli" für unsern "Freund und Kupferstecher" Paul Stuker.

Am Zieschtig 8. Juli 2025 hei mir, anstatt probet im Rössli, üses Summerbrätle ufem Programm gha. We me berücksichtiget, dass Tämperature vo schier 30 Grad uf d'Heufti abe gheit si, hei mir guet usgwähut, si mir i ds Waldrandbeitzli uf Äschle bi Oberdiessbach. Dert si mr fürschtlech vo Erwin u dr Barbara verwöhnt u vo Käthi bewirtet worde. Unkompliziert, fein u gmüetlech, äbe GASCHTFRÜNDSCHAFT. Mir heis aui sehr gnosse, härzleche Dank DIR DRÜ.🙏 Gwüss schier gäge Mitternacht zue isch es gange wo mir de du mit em ne "DibiDäbi" gsterkt 🙃 dr Waudrand richtig Bettehuse hei verlah.

U DE GEIT HAUT NÜT ÜBER NE GUETI KAMERADSCHAFT, ES HET MEGA GFÄGT KAMERADE !

Hie es paar Idrück:

üse Merängge-Moudi

Am 1. Juli 2025 hei mir im SILEA im Gwatt d'Bewohner mit üsne "Xsäng" erfröit u "Thunerbuebe" hei üsi Verschnufpouse mit ihrne Musigilage usgfüllt.. Es isch tüppig u heiss xsi, d'Mineralquelle Adelbode het chum nachemöge mit Nachschueb liefere..... 🤣

Mir hei am 10. Mai 2025, am LETSCHTE FRÜHLIGSKONZÄRT vo de THUNER-VERBANDS-JODLER-KLÜB i dr Rithalle ds Thun dörfe drbi si. Es het Zyte gäh, da hets ufem Platz Thun 10 Jodlerklüb gäh. Am letschte Konzärt sis mit em Allmendinger-Chörli zäme, no grad vier Klüb gsi. (JK Thun-Heimelig Thun, JDQ Bärgfründe Thun u üsi Wenigkeit). Dr Verein TVJK gseht ke Notwändigkeit meh ufrächt erhalte ds wärde und wird somit ufgläst. " ja die Zeiten ändern sich....."

Ds "astössige Läbe" geit im 2025 grad wyter.... mit Träberwurstässe und em Werner Wenger sim Geburtstag..... das kann ja noch heiter werden....😂👍